Маловиште – село во Општина Битола

Село Маловиште (Маловишта) е единствена населба во границите на Националниот парк Пелистер, во која денес живеат помалку од 100 жители. Административно во рамките на Општина Битола до селото води асфалтен пат во должина од околу 22 км западно од Битола.

Селото е специфично по традиционалната и автентична архитектура и сочуваните калдрмести улици. Може да се каже дека бисер на архитектурата во ова село и поширокиот регион е црквата Св. Петка, која е сместена врз вештачки оформено плато, во централниот дел на селото. Изградена во 1856 година црквата плени со сочуваниот фрескоживопис, дрвениот иконостас изработен во длабока резба и богатата галерија на икони.

Познато е дека во околината на селото постоеле населби уште од античко време, а за денешната локација постојат заиси дека постои од 16 век. Во 19 век во селото се населуваат голем број на Власи од Москополе и Епир, и бројот на жители ја надминал бројката од 2000. Според Васил К’нчов (Македонија, Етнографија и статистика) во 1900 година, Маловиште е големо село со 2 300 жители.

Со текот на годините, селото ја доживеало судбината на сите околн села и постојаното иселување довело до тоа во 2002 година кога е извршен последниот попис во селото да има 98 жители, бројка која денес со сигурност е дополнително намалена.