Село Буково е сместено во јужниот дел на Општина Битола, на надморска височина од околу 770 метри. Опкружено со живописна природа и богато со вода, низ селото течат Стара Река и Киндарка, а низ селото се наоѓаат и голем број селски чешми и природни извори.
За богатото минато на Буково сведочи и неговата традиционална архитектура. Дел од старите куќи се изградени во стил карактеристичен за битолската градска архитектура, сличен на оној што може да се сретне на Широк Сокак.
Токму оваа архитектура, заедно со старите храмови и природното опкружување, му дава на селото препознатлив изглед и посебен историски карактер.
За потеклото на населението во Буково постојат различни претпоставки. Според едни толкувања, населението се доселувало од селата во околината, додека според други автори, дел од жителите во Буково се населиле од Хераклеја Линкестис по постепеното замирање на животот во античкиот град.
Буково е надалеку познато и по традиционалниот црвен пипер, познат како „буковец“. Производството на буковецот е дел од локалната традиција и претставува препознатлив белег на селото, чие име денес е неразделно поврзано со овој прочуен производ.
Црквите и манастирите во Буково
Во Буково и неговата околина во текот на XIX и почетокот на XX век биле обновени или изградени повеќе христијански храмови. Тие и денес претставуваат значаен дел од духовното и културното наследство на селото.
Црква „Св. Димитриј“
Црквата „Св. Димитриј“ е изградена кон крајот на XIX век и претставува главна селска црква. Се наоѓа во центарот на Буково, а објектот е изведен како трикорабна базилика со камбанарија од западната страна.
Особено внимание привлекува богатата збирка икони, сместена во горната галерија на храмот, која претставува значаен дел од црковното наследство на селото.
Црква „Св. Богородица“
Црквата „Св. Богородица“ се наоѓа во југоисточниот дел на Буково, на возвишение од кое се отвора прекрасна панорама кон селото и околината.
Во црковниот двор се наоѓа дел од селските гробишта. На влезот во храмот е поставена спомен-плоча со натпис:
„Спомен капела за загинатите во војната од 1914–1918 г. Подигнале селаните на село Буково 1927.“
Црква „Св. Никола“
Црквата „Св. Никола“ е голем трикорабен храм, сместен во јужниот дел на Буково. Во нејзиниот двор се наоѓаат и селските гробишта.
Со оглед на тоа што во Буково и околината во XIX и почетокот на XX век биле обновени и изградени повеќе христијански храмови, се претпоставува дека и оваа црква потекнува од тој период.
Буковски манастир – „Св. Преображение Христово“
Буковскиот манастир „Св. Преображение Христово“ се наоѓа во живописна шума, на околу два километри од Буково. Манастирскиот комплекс го сочинуваат манастирската црква, портата, конаците со кујна и трпезарија, камбанаријата и повеќе помошни објекти.
За историјата на манастирот не постојат многу зачувани податоци. Според некои извори, денешниот манастир бил изграден врз темелите на постара црква. Денешниот манастирски комплекс датира од 1837 година, а во 1845 година во него престојувале и двајца монаси.
Манастирот и денес го одржува локалното население. Поради близината до Битола, чистиот воздух и живописната природа, тој е една од омилените места за одмор и пикник на битолчани.
Буковскиот манастир имал значајно место и во животот на дипломатскиот кор во конзулска Битола за време на Отоманската империја. Во манастирот често престојувал рускиот конзул Александар Аркадиевич Ростковски. Во 1903 година, при враќањето од манастирот кон Битола, Ростковски бил убиен од припадник на османлиската војска.
Манастир „Св. Архангел и Св. Спас“
Манастирот „Св. Архангел и Св. Спас“ се наоѓа западно од Буково, во близина на патот што води кон селото Ореово.
Сместен во густа букова шума, манастирот е опкружен со мир и природа и претставува пријатно место за одмор, особено во летните месеци.
Како да стигнете до село Буково
Село Буково се наоѓа на само неколку километри јужно од Битола и до него се стигнува по локален асфалтен пат. Од центарот на Битола, следете го патот во правец кон јужниот дел на градот, од каде што патот продолжува директно кон селото. Поради близината до Битола, Буково е лесно достапно со автомобил и претставува одлична дестинација за краток излет и прошетка во природа.
Доколку немате сопствено возило, изнајмувањето автомобил е одлична опција за удобно истражување на Битола и нејзината околина – погледнете ги актуелните цени и понуди на DiscoverCars
Сместување во село Буково
Повеќе информации и резервација (Booking.com)
Прочитајте повеќе:
